ڕۆژانه 800 هه‌زار دۆلار غەرامه‌ی ڕاگرتنی نه‌وتی كوردستان ده‌درێت
19 کاتژمێر پێش ئێستا
142 جار خوێنراوەتەوە
دوو ساڵ به‌سه‌ر بڕ‌‌یاره 277 لاپه‌ڕ‌‌ه‌ییه‌كه‌ی پاریس تێده‌په‌ڕ‌ێت كه بووه هۆی راگرتنی هه‌نارده‌ی نه‌وتی هه‌رێم و زیانه‌كان به 21 ملیار دۆلار ده‌خه‌مڵێندرێت، له‌گه‌ڵ ئه‌وه‌ی هه‌وڵه‌كانی هه‌ردوو حكومه‌تی عیراق و هه‌رێم بۆ هه‌نارده‌كردنه‌وه‌ی نه‌وته‌كه به‌رده‌وامی هه‌یه، به‌ڵام هه‌تا ئێستا هیچ بڕ‌ه نه‌وتێكی هه‌رێم له‌ڕ‌ێگه‌ی كۆمپانیای نیشتمانی سۆمۆوه هه‌نارده نه‌كراوه‌ته‌وه، پسپۆڕ‌ی بواری وزه‌ش ده‌ڵێت:" ده‌بێت عیراق رۆژانه 800 هه‌زار دۆلار غرامه‌ی راگرتنی نه‌وتی كوردستان بداته توركیا".
رێبوار محه‌مه‌د ئه‌مین پسپۆڕ‌ی بواری وزه بە میدیای فەرمی یەکێتیی وتووە: "ڕاگرتنی هه‌نارده‌ی نه‌وتی كوردستان له ڕ‌ێگه‌ی بۆری جه‌یهانه‌وه، بووه هۆكاری قه‌ره‌بوو( غرامه)یه‌ك به‌بڕ‌ی 800 هه‌زار دۆلاری ڕۆژانه كه پێویسته عیراق بیداته توركیا كه‌به‌پێی ئه‌و گرێبه‌سته 50 ساڵه‌ی نێوان توركیاو عیراق كه‌له مانگی حوزه‌یرانی 2025 كۆتایی دێت كه‌ناوه‌ڕ‌ۆكه‌كه‌ی بریتی یه له‌گواستنه‌وه‌ی نه‌وتی عیراق به‌بۆری كه‌ركوك -جه‌یهان له‌ڕ‌ێگه‌ی كۆمپانیای سۆمۆوه".
هه‌رچه‌نده حكومه‌تی هه‌رێم له‌ڕ‌ۆژی 2ی 4ی 2023، به‌ڕ‌‌ه‌سمی هه‌نارده‌كردنی نه‌وتی راده‌ستی به‌غدا كرد، به‌ڵام هه‌تا ئێستا نه‌وت له‌هه‌رێمه‌وه به بۆری بۆ ده‌ره‌وه‌ی عیراق هه‌نارده نه‌كراوه‌و نزیكه‌ی ساڵێكیشه هه‌وڵه‌كانی حكومه‌تی هه‌رێم و حكومه‌تی عیراق و حكومه‌تی توركیاش بۆ هه‌نارده‌كردنه‌وه‌ی نه‌وتی هه‌رێم به‌رده‌وامه.
زیانه خه‌مڵێنراوه داراییه‌كان به‌م شێوه‌یه‌ن
رێبوار محه‌مه‌د ئه‌مین راشیگه‌یاند:"رۆژانه له‌هه‌رێم بڕ‌‌ی 286 هه‌زار به‌رمیل نه‌وت به‌رهه‌م دێت، ئه‌گه‌ر به‌گریمانه به‌رمیلی به 73 دۆلار دابنرێت كه له‌ماوه‌ی دوو ساڵی رابردوودا زیاتر له‌و بڕ‌ه‌دا بووه، ده‌كاته بڕ‌‌ی 20 ملیارو 878 ملیۆن دۆلار، (له‌كاتێكدا له ئه‌مڕ‌‌ۆداشدا نرخی یه‌ك به‌رمیل نه‌وتی خاوی برێنت له‌بازاره‌كانی جیهاندا به بڕ‌‌ی 73 دۆلاره)، كه مانگانه ده‌گاته 626 ملیار و 340 ملیۆن دۆلار)".
عیراق دژی هه‌نارده‌ی نه‌وتی هه‌رێم بوو
حكومه‌تی هه‌رێمی كوردستان له ساڵی 2010وه پڕ‌ۆژه‌ی دروستكردنی بۆری نه‌وتی كوردستانی ده‌ستپێكردو له‌كۆتایی ساڵی 2013دا بۆ یه‌كه‌مجار نه‌وتی هه‌رێم به بۆری بۆ ناو خاكی توركیا هه‌نارده‌كراو له وێشه‌وه له‌ڕ‌ێگه‌ی بۆری هاوبه‌شی عیراق- توركیاوه گه‌یه‌ندرایه به‌نده‌ری "جه‌یهان"و ره‌وانه‌ی بازاڕ‌‌ه‌كانی جیهان كرا، به‌هۆیه‌شه‌وه ناكۆكی له‌نێوان حكومه‌تی عیراق و توركیا له‌باره‌ی خاوه‌ندارێتی بۆرییه‌كه سه‌ریهه‌ڵدا.
حكومه‌تی عیراق دوای ده‌ستپێكردنی هه‌نارده‌ی نه‌وتی هه‌رێم له‌ساڵی 2014 له‌پاریس سكاڵای دژی توركیا تۆماركرد، له‌ساڵی 2023 ئه‌نجامه‌كه‌ی ده‌ستكه‌وت و هه‌نارده‌ی نه‌وتی هه‌رێمی كوردستانی راگرت.
|