مەلابەختيار لەبارەی هێرشەکەی سەر لالەزار هاتە دەنگ

مەلابەختيار لەبارەی هێرشەکەی سەر لالەزاری سلێمانی دەڵێت بەشێك نیم لەوەی لە سلێمانی روویداو رەتیشیدەكەمەوە جەختی لەوەشکردەوە لە (5 بۆ 10) ساڵی داهاتوو شتێك نامێنێت لە كوردستان و عێراق و ناوچەكەش، بەناوی گروپى چەكداری كۆنتڕۆڵنەكراو.

مەلابەختیار سیاسەتمەداری دیاری کوردستان ، لەمیانی بەشداریكردنی لە كۆنفرانسی دیموكراسی كە لە بەغدادی پایتەخت بەڕێوەدەچێت وتی: لەناو عێراق دەوڵەتی قووڵ هەیە، عێراق هێزی چەكداری گەورەتری هەیە لە كوردستان، هەندێك رووداومان بینینى لە بەغداد روویانداوە لە كوردستانیش روویانداوە، پێویستە هێزی چەكدار شەرعی بێت و دەستور جێبەجێبكات و بیپارێزێت.

ئاماژەی بەوەشکرد، لەماوەی ( 5 بۆ10) ساڵی داهاتوودا شتێك نامێنێت بەناوی هێزی چەكدارو گروپی چەكدار لە عێراق و كوردستان، و نابێت هیچ هێزێك بمێنێتەوەو ناشمێنێتەوە.

مەلابەخیتار راشیگەیاند: دڵنیاتان دەكەمەوە، نە لە عێراق و نە لە كوردستان و نە لە ناوچەكەش گروپە چەكدارە كۆنتڕۆڵنەكراوەكان نامێننەوە، بەوپێیەی بووەتە هۆی ئەوەی كێشەیەكی ئێجگار گەورە لە رۆژهەڵاتی ناوەڕاست رووبدات، ئەمانە حاڵەتێكی تەندروست بوون بۆ ئەوەی دەوڵەت و دامەزراوە پێكبهێنرێت، ئەوە دۆخێكی تایبەت و راگوزەر بوو كە تێمان پەڕاند.

جەختی لەوەشکردەوە: بەهیچ شێوەیەك بەشێك نیە لە دۆخێكی سەربازی نەخوازراو نە لە كوردستان و نە لە سلێمانی ئەگەر روویدابێت و بەهەموو شێوەیەكیش رەتیدەكەمەوە، هیواشی خواست ئەوەی لە سلێمانی روویدا لە هیچ ناوچەیەكی تری عێراق روونەداتەوە.

مەلابەختیار لە درێژەی قسەكانیدا وتی: هێزی چەكداری لۆكاڵی و حزبی زیان بە دیموكراسی و زیان بە هاوڵاتیان و ئازادییەكانی هاوڵاتیان دەگەیەنن، بەهیچ شێوەیەكی ئەمە دۆخێكی دروست نییە.