كۆمیسیۆنی هەڵبژاردنەکان شەش مانگ مۆڵەت دەداتە گۆڕان

کۆمیسیۆنی باڵای سەربەخۆی هەڵبژاردنەکانی عێراق، بۆ بەستنی کۆنگرە ماوەی شەش مانگ مۆڵەت دەداتە بزووتنەوەی گۆڕان.
 
جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق، رایگەیاند، ئەنجوومەنی کۆمیسیاران لە کۆمیسیۆنی باڵای سەربەخۆی هەڵبژاردنەکانی عێراق، رۆژی 24ی ئەم مانگە کۆبووەوە و بڕیاری دا شەش مانگ مۆڵەت بدرێتە بزووتنەوەی گۆڕان، تاوەکو کۆنگرەی گشتیی حیزبەکە ببەستێت.
 
بڕیارەکە لە رۆژی دەرچوونیەوە دەکەوێتە بواری جێبەجێکردنەوە. بەگوێرەی بڕیارەکە، دوای تەواوبوونی رێژەی یاسایی لە کۆی گشتیی ئامادەبووان، بڕیارەکانی کۆنگرەکە بە زۆرینەی رەهای ئامادەبووان پەسند دەکرێت.
 
بزووتنەوەی گۆڕان بووەتە دوو ئاراستە، یەکێکیان بە گۆڕانی گردی زەرگەتە و ئەوی دیکە بە گۆڕانی کوردسات دەناسرێت. هەردوو ئاراستەکەی گۆڕان، ناکۆکییان لەسەر دەستووری بزووتنەوەکە هەیە؛ لە گردەکە دەڵێن، بەپێی دەستوورەکەیان نابێت لە کۆنفرانس رێکخەر هەڵبژێردرێت، ئاراستەکەی دیکەش دەڵێن، مەرجی کۆمیسیۆنە رێکخەر هەڵبژێردرێت.
 
دواجار و دوای دوو کۆنفرانسی جیای دوو باڵی گۆڕان، 24ی ئایاری 2025 لە شاری سلێمانی کاتژمیر08:00ی بەیانی دەرگای چوونەژوورەوە بۆ کۆنفرانسی بزووتنەوەکە بە سەرپەرشتیی کۆمیسیۆنی باڵای هەڵبژاردنەکانی عێراق کرایەوە، بەڵام بەهۆی کێشە و ناکۆکییەکانی نێوان هەردوو باڵەکە، کۆنفرانسەکە دواخرا.