سەدامم چۆن بینی؟

ساڵ ساڵی كوردقڕانەكە بوو، كۆمەڵێك خوێندكاری هەڵەبجەیی بووین لە زانكۆی موسڵ، لە كەسوكارمان دابڕابووین، وەیشومەی 1988 لەلایەك هەڵەبجە و سیۆسینان و بالیسان بە ژەهر خنكێنرابوون، لەلایەكی تر گەرمیان سەروماڵی  فەوتابوو، چاوی  بەعس لەسەر بادینان بوو، ناوی سلێمانیش بۆ راگواستن لێرەولەوێ باسدەكرا.. خەڵكی هەڵەبجەش، ئەوەی شەهید بوو، گۆڕغەریب بوو، ئەوەی بە كیمیاوی بریندار بوو، لە كەمپ و نەخۆشخانەكانی ئێراندا چارەدەكران، ئێمەش چەند سەد خوێندكارێكی خەڵكی ئەو شارە بووین لە زانكۆكانی موسڵ و بەغداد و بەسرە و سەڵاحەدین لەكەسوكارمان دابڕابووین، نەماندەزانی خێزانەكانمان ماون، یان شەهید بوون، یان بریندارن، لە دۆخێكی ئێجگار خراپدا دەژیاین، دەروونمان شێوابوو، پارەمان لێبڕابوو، كەس نەیدەزانی چیمان بەسەردێت!!؟؟

 دەمەوێت باسی شەوێكتان بۆ بكەم، نزیكەی سەعات 9 بوو، زیاتر لە 10 خوێندكاری هەڵەبجەیی لە بەشی ناوخۆیی لە ژوورەكەی ئاواتی رەسام كۆببووینەوە، باسوخواس تەنیا داماویی هەڵەبجە و سەگبابی سەدام بوو، یەكێك دەیوت سەدام حسێن بكەوێتە بەردەستم لەتوپەتی دەكەم، یەكێك دەیوت نایكوژم دەیخنكێنم، ئیتر هەموومان ببووینە رۆستەمی زاڵ.. من سەعات 10 مەجلیسم جێهێشت، لە بەشە ناوخۆییەكانەوە هاتمە خوارەوە گەیشتمە ترافیك لایتەكەی نزیك مزگەوتی هەیبەت خاتون، سەرم داخستبوو بەدەمڕێوە لە قووڵایی خەمەكانمدا نغرۆببووم، لەپڕ چاوم كەوتە سەر پلەیەكی سەربازی سەرشان كە لە میدیا و تیڤییەكاندا زۆر بینیبوم لام نامۆ نەبوو، بەس چاوم هەڵبڕی لەسەر شانەوە بۆ دەموچاوی خاوەن پلەكە، رێك سەدام حسێن خۆی بوو لە پێشی مارسیدسێكی سپی ریئاسیدا دانیشتبوو، من تەنیا چەند ساتێك حەپەسام و نەگەشتە 5 چركە، ئەوان لە ترافیك لایتەكەدا وەستابوون، هەر ئەوەندەم زانی بە جارێك لە 100 لاوە هاتووهاوار دەستی پێكرد بە زمانی رەق و زبر (ولك اتحرك) لە دووری دەیان مەترەوە حیمایەكان لوولەی چەكەكانیان لە ئۆتۆمبیلەكانەوە دەرهێنابوو، بە هێواشی من كشامەوە و هاتمە بەردەم كۆگاكانی تەنیشت مزگەوتەكە.. 

پیاوێكی بەتەمەن شەرواڵی لەبەربوو عەگالی بەسەرەوە، هاتە تەنیشتم، بەزمانێكی موسڵاوی خەست وتی (أشبیك رب الحلو زاید علی أهلك؟ عندك لحیة وتدحق علی سید الرئیس في موكبه؟ روح صلي ركعتین لربك بعدك عایش)، خەڵك هەموو بە حەپەساوی و بە بێدەنگی لە من و كەژاوەكەی سەدامیان دەڕوانی!! بەڵام من چیم دی؟! من دەڵێم سەد ترۆمبیل تۆ بڵێ هەزار بە راجیمە و رادار و تۆپی دوورهاوێژ و ئەمبوڵانس و لۆری و هەرچی چەكێك تۆ بڵێی بۆ داگیركردنی وڵاتێك لە رەتڵ و مەوكب و سوپا ئامادە كرابوون.

مەبەستم لە گێڕانەوی ئەم بەسەرهاتە دوو شتە: یەكەم/ هەموو هەڕەشەكانمان لە سەدام فشە دەرچوون، بۆیە نابێت مرۆڤ لە خۆیەوە هەڕەشە بكات، ئەگەر لە توانایدا نەبوو جێبەجێی بكات، چونكە من تەنیا مەترێك تا دوو مەتر لەو خوێنمژەوە دوور بووم، هیچیشم نەكرد..

دووەم/ لەو شەوەدا بۆم دەركەوت سەدام پیاوێكی زۆر ترسنۆكە و تەنیا لە میدیا عیراقی و عەرەبیەكاندا وەك پاڵەوان ناسرابوو، سوپایەكی لەگەڵ خۆیدا هێنابوو بۆ پارێزگاریی، چونكە ئێران چەند مووشەكێكی زەوی بەزەوی گرتە بەغداد، ئەم پیاوە بارەگای بەغدادی گواستەوە بۆ موسڵ، پاش ئەوەی ئێران چەند موشەكێكی بە موسڵیشەوە نا، ئەوسا سەدام خۆی و سوپاكەی گەڕانەوە بەغداد..هەرواش بوو قسەكەی من بوو، چۆن هەڕەشە و گوڕەشەكانی ئێمەی خوێندكار هەمووی فشەبوون، سەدامیش كە بە پاڵەوانی عروبە ناسرابوو، لە كونە سەگێكدا بە بێ تەقە دەستگیر كرا..

ئەمەش لە سێگۆشەی خڕ دەچێت.