فەرماندەیی ئۆپەراسیۆنە هاوبەشەکانی عێراق هەڵدەوەشێندرێتەوە
1 کاتژمێر پێش ئێستا
152 جار خوێنراوەتەوە
لە چوارچێوەی کارنامەی حکومەتەکەی زەیدی و کۆنترۆڵکردنی چەک لە دەستی دەوڵەتدا، بڕیار دراوە فەرماندەیی ئۆپەراسیۆنە هاوبەشەکان هەڵبوەشێندرێتەوە و ئەرک و دەسەڵاتەکانی بگوازرێنەوە بۆ "نووسینگەی فەرماندەی گشتیی هێزە چەکدارەکان".
ڕووداو بڵاویکردەوە: "بڕیارەکە هەڵوەشاندنەوەی فەرماندەیی ئۆپەراسیۆنە هاوبەشەکان بە شێوەی ئێستای و گۆڕینی بۆ نووسینگەی فەرماندەی گشتیی هێزە چەکدارەکانە، چارەنووسی فەرماندە و یەکە پەیوەندیدارەکان دەگەڕێنەوە شوێنی خۆیان لە نێو سوپا".
ئاماژەی بەوەشکردووە، بڕیارەکە فەرماندەیی ئۆپەراسیۆنەکانی پارێزگاکانیش دەگرێتەوە، دەسەڵاتەکانی دەگوازرێنەوە بۆ نووسینگەی فەرماندەی گشتی.راشیگەیاند: "ئەم بڕیارە لە چوارچێوەی بەرنامەی حکومەتدایە دەبێت چەک لەدەستی دەوڵەت بێت تاوەکو 30ـی 9 کۆتایی بە چەکی دەرەوەی دەوڵەت بهێندرێت".
ئەم بڕیارە دوای چەند رۆژێک دێت لەوەی عەلی زەیدی، سەرۆکوەزیران و فەرماندەی گشتیی هێزە چەکدارەکانی عێراق، فەریق یەکەم روکن عەبدولئەمیر شەمەری، وەزیری پێشووی ناوخۆی بۆ پۆستی بەڕێوەبەری نووسینگەی فەرماندەی گشتیی هێزە چەکدارەکان راسپارد، بۆ ئەوەی ئەرکی هاوئاهەنگی و ئاراستەکردنی دەزگا و پێکهاتە ئەمنییەکان بگرێتە ئەستۆ.
پۆستی بەڕێوەبەری نووسینگەی فەرماندەی گشتیی هێزە چەکدارەکان لە هەندێک خولی حکومەتدا، نووسینگەی فەرماندەی گشتیی هێزە چەکدارەکان وەک دەزگایەکی کارگێڕی/سەربازیی هەڵوەشێندرایەوە و قەبارەکەی بچووککرایەوە و دەسەڵاتە کارگێڕییەکانی دووبارە بەسەر وەزارەتەکانی بەرگری و ناوخۆ و فەرماندەیی ئۆپەراسیۆنە هاوبەشەکاندا دابەشکرایەوە، بەبێ ئەوەی دەستکاری پۆستی سەرۆکوەزیران وەک فەرماندەی گشتی بکرێت. ئێستا دووبارە لەلایەن حکومەتەکەی زەیدییەوە کارا کراوەتەوە.
گۆرانکارییەکان بەم شیوەیەن:
- راسپاردنی فەریق یەکەم روکن عەبدولئەمیر شەمەری وەک بەڕێوەبەری نووسینگەی فەرماندەی گشتیی هێزە چەکدارەکان.
- دیاریکردنی فەریق روکن جەبار نەعیمە وەک ئەمینداری نووسینگەی فەرماندەی گشتیی هێزە چەکدارەکان.
- لادانی فەریق یەکەم روکن قەیس مەحمەداوی لە پۆستی جێگری فەرماندەی ئۆپەراسیۆنە هاوبەشەکان و دیاریکردنی وەک راوێژکاری سەربازیی فەرماندەی گشتی، ئەمەش وەک ئامادەکارییەک بۆ هەڵوەشاندنەوەی فەرماندەییەکە.
فەرماندەیی ئۆپەراسیۆنە هاوبەشەکان لە دوای ساڵی 2003 لە عێراق دامەزرا، بە ئامانجی یەکخستنی ئیدارەی ئۆپەراسیۆنەکان و هاوئاهەنگی لە نێوان وەزارەتەکانی بەرگری، ناوخۆ و دەزگا ئەمنییەکانی دیکە لەگەڵ هێزەکانی ئەمریکا لەژێر سەرپەرشتیی ڕاستەوخۆی فەرماندەی گشتیدا.
|