هەنگاوەکانى هاوتاکردنى مووچەى زیندانیانى سیاسى دەستیپێکرد
1 کاتژمێر پێش ئێستا
34 جار خوێنراوەتەوە
هەنگاوەکانى هاوتاکردنى مووچەى زیندانیانى سیاسى هەرێمى کوردستان لەگەڵ حکومەتى فیدراڵ دەستیپێکرد و بۆ ئەو مەبەستەش شاندێکی وەزارەتى کاروبارى شەهیدان و ئەنفالکراوان لە بەغدادە.
ئەحمەد مام رەسوڵ بەڕێوەبەرى گشتى خزمەتگوزارییەکان لە وەزارەتى کاروبارى شەهیدان و ئەنفالکراوانى هەرێمى کوردستان و ئەندامى شاندەکە رایگەیاند: بە مەبەستى دەستەبەرکردنى مافە دەستوورى و یاساییەکانى قوربانیانى خەڵکى کوردستان لە سەردەمى رژێمى بەعسدا، هەموو هەوڵێکمان داوە بۆ چارەسەرى گرفتەکانى نێوان هەرێمى کوردستان و حکومەتى فیدراڵ.
وتیشى: لەماوەى رابردوودا بەهەوڵى نوێنەرانى کورد لە بەغداد توانرا یاساى دامەزراوەى زیندانیانى سیاسیى عیراق لە بەرژەوەندى زیندانیانى سیاسیى هەرێمى کوردستان هەمواربکرێتەوە.
ئەحمەد مام ڕەسول ئاماژەی بەوەشکرد بۆ جێبەجێکردنى ئەو یاسایە و دەستەبەرکردنى تەواوى مافى قوربانیانى خەڵکى کوردستان دوو رۆژە شاندێکی هەرێمى کوردستان بەسەرۆکایەتى عەبدوڵا حاجی مەحمود وەزیرى کاروبارى شەهیدان و ئەنفالکراوان لە بەغدادە و لەگەڵ لێپرسراوانى حکومەتى فیدراڵدا کۆدەبێتەوە.
باسى لەوەشکرد ئەوەى پەیوەندى بە زیندانیانى سیاسى هەرێمى کوردستانەوە هەیە، بە گوێرەى هەموارکردنى یاساکەى عیراق پێویستە مووچەکانیان هاوشێوەى تەواوى پارێزگاکانى ناوەڕاست و باشوورى عیراق بێت، لەگەڵ پشتڕاستکردنەوە و تۆمارکردنى ناوى هەموو ئەو زیندانیانەى کە تا ئێستا مووچەیان بۆ دەرنەچووە.
|