ئایا خۆڵبارین چارەسەری هەیەو دەتواندرێت ڕێگری لێ بکرێت؟
2025-05-28
585 جار خوێنراوەتەوە
ئەم هەموو پێشکەوتنەی دونیا دەتوانێت ڕێگری لە خۆڵبارین بارین بکات؟
خۆڵبارین وەکو کارەساتێکی هاوشێوەی زەمین لەرزەو گەردەلولە خولگەییەکان بێ چارەسەرە و ساڵانە زیانی میلیۆنەها دۆلار لە زۆرینەی ووڵاتانی جیهان دەدات، هەوڵدان بۆ رێگرتن لە خۆڵبارین وەکو هەوڵدانە بۆ رێگرتن لە گەیشتنی تیشکی خۆر بەزەوی، چونکە سەرچاوەی دروستبوونی خۆڵبارین ناوچە ووشک و بیابانیەکانە کە نزیکەی %35 رووبەری ووشکانی زەوی پێکدەهێنن.
خاکی ئەم ناوچانە خاکێکی لماوی یان وورد و فشەڵە بە بوونی بای خێرا یان داکەوتنی هەوا، ئەم کارەساتە دروست دەبێت و مەودایەکی فراوان بەشێوەی ستونی و ئاسۆیی دەگرێتەوە، کە هەندێک جار بەبەرزی 6 کیلۆمەتر و بەدوری 6000 کیلۆمەتر بەبەرگی گازی (بەهەوادا) بڵاودەبنەوە، کەواتە نەوەک روبەری سەوزایی و دارستان و بەرزی دارەکان بەڵکو بەرزی شاخەکان و شێی دەریاو زەریاکانیش ناتوانن ببن بەبەربەست لەبەردەم بڵاوبونەوە و دابارینی خۆڵ و تۆزی ناوچە ووشکەکان .
رەنگە پرسیاری ئەوە بکرێت ئایا دروستکردنی پشتێنەی سەوزایی یان چاندنی دارو زیادکردنی رووبەری سەوزایی دەبێتە رێگر لەبەردەم کارەساتی خۆڵبارین؟
بە پێی زۆرینەی توێژینەوەکان چاندنی دار و زیادکردنی سەوزایی ناتوانێت بنبری دیاردەی خۆڵبارین بە یەکجاری بکات بەڵکو کاریگەریەکەی بەرێژەی %30 کەم دەکاتەوە هەروەها سەوزایی دەتوانێت رێژەی خۆڵ لەهەوا کەم بکاتەوە بەڵام ناتوانێت کارەساتەکە رابگرێت ، تەنها لە حاڵەتێک نەبێت ئەویش هەموو ناوچە ووشک و بیابانەکانی سەر زەوی بە تەواوی بکرێت بەدار و دارستان، ئەمەش ناتوانرێت چونکە زەوی ئەو ناوچانە خاکیان نەماوە تا روەک و داریان لەسەر بروێت و هەروەها خودی ناوچەکە گرفتی ئاوهەوای ووشک و کەمی دابارینی هەیە و ئاوی سەرزەوی و ژێر زەوییان نیە بۆ ئاودێری کردن، بۆیە سەوزکردنیان کارێکی ئەستەمە لەتوانای مرۆڤدا نیە .
کارەساتی خۆڵبارین کارەساتێکی نوێ نیە و لەگەڵ بونی بیابانەکان روودانی هەبووە، بەڵام زیادبونی لە ئێستادا هۆکارەکەی ئەو ووشکەساڵییە کەڕووی لەناوچەکە کردوەو هەروەها گۆرانە خێراکانی کەشوهەوای ناوچەکەیە بەتایبەت ئەو گۆرانانەی لەپەستانی هەوای سەر ناوچەکە رۆژانە ڕوو دەدەن.
|