پاڵەوانێتیی شەترەنجی رۆژئاوای ئاسیا لە هەولێر بەڕێوەدەچێت

یەکێتیی شەترەنجی وڵاتانی رۆژئاوای ئاسیا بەشێوەیەکی فەرمی بڕیاریدا پاڵەوانێتیی وڵاتانی ئاسیا لە شاری هەولێر ساز بکات، براوەکانی پاڵەوانێتییەکەش راستەوخۆ مافی بەشدارییان لە پاڵەوانێتیی جیهان پێدەدرێت. 
 
یەکەمجارە لە مێژووی وەرزشیی عێراق میوانداری پاڵەوانێتیی شەترەنجی وڵاتانی رۆژئاوای ئاسیا دەکات، یازدە وڵات لەسەر ئاستی پیاوان و خانمان بەشداریی کێبرکێکانی دەکەن کە بریتیین لە عێراق، ئێران، ئوردن، کوێت، لوبنان، فەڵەستین، قەتەر، عومان، ئیمارات، بەحرەین لەگەڵ یەمەن. 
 
یارییەکان بەشێوەیەکی فەرمی رۆژی 8ـی ئەم مانگە دەستپێدەکەن، رکابەرییەکان بەشێوازی 9 گەڕی سویسری هەفتەیەک دەخایەنێت، یەکێتیی شەترەنجی رۆژئاوای ئاسیا هەواهەنگی لەگەڵ بەڕێوەبەرایەتی گشتی وەرزشیی کوردستان بۆ دابینکردنی ئۆتۆمبێلی تایبەت بۆ میوانان لە فڕۆکەخانەی هەولێر و فڕۆکەخانەی سلێمانی کردووە.
 
دڵزار حەمەساڵح، سەرۆکی یانەی شەترەنجی خانزاد، لەبارەی ئامادەکارییان بۆ پاڵەوانێتییەکە رایگەیاندووە "مایەی شانازییە پایتەختی کوردستان جارێکی دیکە باوەش بۆ رووداوێکی دیکەی وەرزشی نێودەوڵەتی دەکاتەوە، بێگومان هەموو ئامادەکارییەکان تەواو بوونە و دەمانەوێت بەشێوازێکی زۆر باش وەک یەک تیم لەگەڵ برایانمان لە تیمی حکومەت و یەکێتیی شەترەنجی هەولێر و عێراق و لیژنەی ئۆڵۆمپی میواندارییەکی باش بکەین".
 
هەر وڵاتێک دەتوانێت بە دوو یاریزان بەشداری بکات کە میوانی پاڵەوانێتییەکەن، بەڵام چاوەڕواندەکرێت ژمارەی یاریزانەکان زیاتر بن، لەبەرئەوەی بەشێک لە وڵاتان یاریزانان لەسەر خەرجی خۆیان دەهێنن، هەڵبژاردەی عێراق بە 17 یاریزان کە هەشتیان کوردن بەشداری دەکات، هەڵبژاردەی ئێران بە زیاتر لە 8 یاریزان بەشداری دەکات. 
 
حەمەساڵح، زیاتر روونیکردەوە "هاتنی وەرزشوانان و کەسایەتییەکانی کەنداو بۆ ئەوە دەگەڕێتەوە، ئێمە بە هاوکاریی یانەی ئەسپسواری هەولێر و دەزگای خێرخوازی بارزانی رۆژی 14ـی مانگی رابردوو پاڵەوانێتییەکی نێودەوڵەتی گەورەمان بەناوی پاڵەوانێتیی بارزانی لە شاری هەولێر سازکرد، بێگومان ئەو راستییە سەلمێندرا و وڵاتانی کەنداو و ناوچەکە ئارامی و سەقامگیری و لەباری شاری هەولێریان بینی، بۆیە بە رێژەیەکی زۆر بەشداری پاڵەوانێتیی رۆژئاوای ئاسیا دەکەن". 
 
گرنگترین ئەو کەسایەتیانەی لە پاڵەوانێتییەکە ئامادە دەبن بریتین:
 
1 - تریم مەتەر محەممەد، سەرۆکی یەکێتیی شەترەنجی ئیمارات
2 - ئەحمەد بلووشی، سەرۆکی یەکێتیی شەترەنجی عومان
3 - محەممەد ئەلمەزحیکی، سەرۆکی یەکێتیی شەترەنجی قەتەر
4 - عادل عومری، ئەندامی یەکێتیی شەترەنجی قەتەر