لە سلێمانی یەکەمین کارگەی شیعری کوردی بەڕێوەچوو

یەکەمین کارگەی شیعری کوردی لەژێر درووشمی "خەونێک دەبێتە حەقیقەت و وشە دەبێتە هەوێنی ژیانەوە"، لە سلێمانی لە کارگەی کولتووری بەڕێوەچوو.

سۆران نەقشبەندی، رێکخەری ئەو چالاکییە ئەدەبییە بە میدیاکانی وت، "ئەم چالاکییە بە مەبەستی دروستکردنی فەزایەکی ئەدەبییە بۆ فێربوون، ڕاهێنان و هاوبەشکردنی ئەزموونی شاعیران و قوتابیان رێکخراوە، هەروەها ئەم کارگەیە کە لەلایەن ژمارەیەک لە رێکخراوە ئەدەبییەکان و هونەرمەندان بەڕێوە دەچێت، کۆمەڵێک چالاکیی گەورەی لەخۆگرتبوو وەکو، وتار، گفتوگۆ، خوێندنەوەی دەق، و رەخنەی ڕوون و پڕۆفیشناڵ لەسەر بەرهەمە شیعرییەکان. بەشداربووان، کە زۆربەیان گەنجن و دەرفەتی ئەوەیان هەیە کە لەگەڵ شاعیران و مامۆستایانی پسپۆڕ راستەوخۆ پەیوەندی بکەن و لە ئەزموونیان سوود وەربگرن."

سۆران نەقشبەندی وتیشی، "لەم کارگەیەدا، گرنگی بە بنەما سەرەکییەکانی شیعر دراوە  وەکو شێوازی زمان، وێنەسازی، هەست و مانا، هەروەها چۆنیەتی دروستکردنی دەقێکی بەهێز کە بتوانێت کارەساتی مرۆڤی و کولتووری بە شێوەیەکی جوان و کاریگەر بگەیەنێت. هەروەها باس لە جۆرە جیاوازەکانی شیعر و شێوازە نوێکان کرا، بەتایبەتی ئەو رێگەیانەی کە شیعری کوردی دەخەنە ناو  پەیوەندییەکی زیندوو لەگەڵ جیهانی هاوچەرخ دا."

سۆران نەقشبەندی باس لە گرنگی ئەو چالاکییە ئەدەبییە دەکات و دەڵێت، "بەشێکی گرنگی کارگەکە تەرخان کرابوو بۆ خوێندنەوەی بەرهەمەکانی بەشداربووان، کە لە دوای ئەوە رەخنە و راوێژێکی ئەکادیمی و هونەری لەسەر کرا. ئەم پرۆسەیە یارمەتیدەری بەشداربووانە تا بتوانن خاڵە لاوازەکانیان بناسن و هەنگاو بۆ پێشەوە بنێن."

ئاماژەی بەوەشدا، "ئێمە ئامانجمان تەنیا فێربوونی تەکنیکی نییە، بەڵکو هەوڵدەدەین هەستێکی نوێی ئەدەبی و بیرکردنەوەیەکی قووڵ لە ناو گەنجاندا بڵاو بکەینەوە، بۆ ئەوەی شیعر تەنیا نووسین نەبێت، بەڵکو بێتە رێگەیەک بۆ دەربڕینی هەست، ناسنامە و کولتوور."

یەکەمین کارگەی شیعری کوردی، هەوڵێکە بۆ پاراستنی رۆحی ئەدەب و بەردەوامکردنی پەیوەندییەکی زیندوو لە نێوان مێژوو و ئێستادا، پەیوەندییەک کە شیعر دەبێتە دەنگی نەتەوەیەک و ئاوڕدانەوە لە هەست و بیرکردنەوەی مرۆڤەکان.