وه‌زاره‌تی كاروباری شه‌هیدان داوای قه‌ره‌بو له به‌غدا ده‌كات
21 کاتژمێر پێش ئێستا
205 جار خوێنراوەتەوە
وه‌زاره‌تی كاروباری شه‌هیدان و ئه‌نفالكراوانی حكومه‌تی هه‌رێم داوا له حكومه‌تی عێراق ده‌كات، ئه‌رك و به‌رپرسیاریه‌تی یاسایی و ده‌ستوری خۆی جێبه‌جێبكات و بنه‌ماڵه و كه‌سوكاری قوربانییانی جێنۆسایدی كوردی فه‌یلی و جێنۆساید و كۆمه‌ڵكوژییه‌كانی دیكه ، به شێوه‌یه‌كی شایسته قه‌ره‌بو بكاته‌وه.
وه‌زاره‌تی كاروباری شه‌هیدان و ئه‌نفالكراوان له ڕاگه‌یه‌ندراوێكدا بڵاویكرده‌وه، "ئه‌مڕۆ یادی 45ه‌مین جینۆسایدی هه‌زاران كوردی فه‌یلی ده‌كه‌ینه‌وه كه له هه‌ڵمه‌تێكی دڕندانه‌ی ڕژێمی پێشوی عێراقدا، ڕوبه‌ڕوی كوشتن و ده‌ستگیركردن و ڕاگواستن و ونكردن و لێسه‌ندنه‌وه‌ی ڕه‌گه‌زنامه و ده‌ستبه‌سه‌رداگرتنی ماڵ و سامانیان بون، ته‌نها له‌به‌ر ئه‌وه‌ی كوردبون".
ئاماژه‌ی به‌وه‌شكردوه، "شاڵاوه‌كانی جێنۆسایدكردنی كوردی فه‌یلییه و ڕژێمه یه‌ك له دوای یه‌كه‌كانی عێراق، به چه‌ندین قۆناخ ئه‌نجامدرا و له ساڵی 1980 گه‌یشته لوتكه‌ی دڕنده‌یی، كاتێك ڕژێمی پێشوی عێراق،له پاكتاوێكی نه‌ژادیدا و به هۆی كوردبونیان، سه‌دان هه‌زار كوردی فه‌یلی له عێراق ده‌ركرد و هه‌زارانیشی بێسه‌روشوێن كرد و ده‌ستی به‌سه‌ر موڵك وماڵ و سامانه‌كانیاندا گرت وناسنامه‌ی لێسه‌ندن".
ئه‌وه‌شیخستۆته‌ڕو، "له‌م یاده‌دا، دوپاتی ده‌كه‌ینه‌وه كه پێویسته حكومه‌تی عێراق به‌پێی بڕیاری دادگای باڵای تاوانه‌كانی عێراق كه ئه‌و تاوانه‌ی به جینۆساید ناساندوه، ئه‌رك و به‌رپرسیاریه‌تی یاسایی و ده‌ستوری خۆی جێبه‌جێ بكات و بنه‌ماڵه و كه‌سوكاری قوربانییانی جێنۆسایدی كوردی فه‌یلی و جێنۆساید و كۆمه‌ڵكوژییه‌كانی دیكه ، به شێوه‌یه‌كی شایسته قه‌ره‌بو بكاته‌وه و ڕه‌گه‌زنامه و ماڵ و سامانیان بۆ بگه‌ڕێنێته‌وه و كێشه‌كانیان چاره‌سه‌ر بكات".
ده‌شڵێت، "جینۆسایدی كوردانی فه‌یلی و هه‌مو هه‌وڵه‌كانی سڕینه‌وه و ئه‌و تاوانانه‌ی دژی گه‌لی كوردستان ئه‌نجام دراون، مێژویه‌كی ڕه‌ش و ڕابردویه‌كی تاڵن، به‌رده‌وام ده‌بین له هه‌وڵه‌كانمان بۆ گێڕانه‌وه‌ی مافه‌كانیان و گرتنه‌به‌ری هه‌مو رێكاری پێویست".
|