كاریگه‌ری بڕیاره‌كانی تره‌مپ له‌سه‌ر عێراق ئاشكراده‌كرێت
19 کاتژمێر پێش ئێستا
482 جار خوێنراوەتەوە
نه‌بیل مه‌رسومی شاره‌زای بواری ئابوری ئه‌مڕۆ پێنجشه‌ممه كاریگه‌رییه‌كانی باجه نوێیه‌كانی دۆناڵد تره‌مپ سه‌رۆكی ئه‌مریكای له‌سه‌ر عێراق ئاشكراكرد كه كاریگه‌ری له‌سه‌ر سه‌رجه‌م وڵاتانی هه‌نارده‌كاری نه‌وت دروستده‌كات.
نه‌بیل مه‌رسومی له لێدوانێكی رۆژنامه‌وانیدا بڵاویكردۆته‌وه، "سه‌رۆكی ئه‌مریكا باجی به‌سه‌ر هه‌مو ئه‌و كاڵایانه سه‌پاندوه كه له‌لایه‌ن ئه‌مریكاوه هاورده ده‌كرێن به ڕێژه‌ی جیاواز له 10% و به‌ره‌و سه‌ره‌وه، به‌ڵام هاورده‌كردنی نه‌وت و غاز و به‌رهه‌مه پاڵاوته‌كانی له باجی گومرگی به‌خشیوه".
ئاماژه‌ی به‌وه‌شكرد، "تره‌مپ باجی 39%ی به‌سه‌ر هه‌نارده‌كردنی عێراق بۆ ئه‌مریكا سه‌پاند، له‌به‌رئه‌وه‌ی هه‌نارده‌ی عێراقیش زۆر سنورداره، بڕیاره‌كه‌ی ئه‌مریكا له‌وباره‌یه‌وه كاریگه‌رییه‌كی كه‌می ده‌بێت، به‌ڵام جێبه‌جێكردنی باجی نوێ كاریگه‌ریی خراپی ده‌بێت له‌سه‌ر بازرگانی و گه‌شه‌ی ئابوری جیهانی ده‌بێت، دواتریش له‌سه‌ر گه‌شه‌ی خواست له‌سه‌ر نه‌وت، له ئه‌نجامدا كاریگه‌ریی خراپی ده‌بێت له‌سه‌ر نرخی نه‌وت، كه له كاردانه‌وه‌یه‌كی خێرادا دو دۆلار له‌ده‌ست ده‌دات".
ئه‌وه‌شیخسته‌ڕو، "ڕۆژانی داهاتو رێژه‌ی كاریگه‌رییه نه‌رێنییه‌كانی ئه‌و باجانه ده‌بینرێن له‌سه‌ر نرخی نه‌وتی جیهانی، هه‌روه‌ها هه‌مو وڵاتانی هه‌نارده‌كاری نه‌وت به عێراقیشه‌وه به‌هۆی ئه‌و باجه نوێیه‌ی تره‌مپه‌وه زیانیان پێده‌گات".
دوێنێ چوارشه‌ممه، دۆناڵد تره‌مپ، سه‌رۆكی ئه‌مریكا ڕایگه‌یاند، ئه‌مڕۆ فه‌رمانی جێبه‌جێكردن واژۆ ده‌كات بۆ سه‌پاندنی باجی به‌رامبه‌ر.
دۆناڵد تره‌مپ ئه‌وه‌شیخسته‌ڕو، له لەئەمڕۆ پێنجشەممەوە ده‌ستده‌كه‌ین به جێبه‌جێكردنی باجی به‌رامبه‌ر و هه‌مان ڕێژه‌ی باج به‌سه‌ر هه‌مو وڵاته‌كاندا ده‌سه‌پێنین كه ئه‌وان به‌سه‌رماندا ده‌سه‌پێنن.
|