دادگای فیدراڵی بڕیارێکی سەردەمی بەعسی هەڵوەشاوەندەوە
28 خولەک پێش ئێستا
30 جار خوێنراوەتەوە
دادگای باڵای فیدراڵیی عێراق بڕیاریدا بە نا دەستووریبوونی بڕیارێکی ئەنجومەنی باڵای شۆڕشی هەڵوەشاوە، کە پێشتر ڕێگریی دەکرد لە تەمەلوککردن و وەبەرهێنانی سەرمایەی کەسانی ناعێراقی (بیانییەکان) لە کۆمپانیاکانی ناوخۆی عێراقدا.
بەپێی ئەم بڕیارەی دادگای فیدراڵی، ئاسانکاریی و ڕێگەخۆشکردنی یاسایی بۆ کەسانی بیانی و ناعێراقی دروست دەبێتەوە بۆ ئەوەی بتوانن سەرمایەکانیان لە کۆمپانیا و پڕۆژەکانی ناو خاکی عێراقدا وەبەرهێنانی پێوە بکەن و خاوەندارێتی بکەن.
بڕیارەکەی دادگای فیدراڵی ئەو بەربەستە یاساییە کۆنەی لابرد کە پێشتر ڕێگری دەکرد لە تەمەلوککردن و وەبەرهێنانی سەرمایەی بیانی لە کۆمپانیاکاندا، واتە بنەمای یاسایی بۆ وەبەرهێنانی بیانی ئێستا کراوەیە.
لەگەڵ ئەوەشدا، پرۆسەی وەبەرهێنانی بیانی لە عێراق و هەرێمی کوردستاندا هێشتا مەرج، ڕێکار، و مۆڵەتی فەرمی لەخۆدەگرێت (وەک مۆڵەتی دەستەی وەبەرهێنان، تۆمارکردنی کۆمپانیا لە وەزارەتی بازرگانی، پابەندبوون بە یاساکانی باج، و ڕێکارە ئەمنی و یاساییەکانی تری وەک وەرگرتنی ڤیزا و ئیقامەی بازرگانی).
بە شێوەیەکی گشتی بیانییەکان مافی وەبەرهێنانیان دەبێت، بەڵام ئەمە بە مەرجی جێبەجێکردنی ڕێکارە فەرمی و یاساییەکانی دەوڵەت و دەستەی وەبەرهێنان دەبێت، نەک بە شێوەیەکی بێ مەرج و کۆنترۆڵنەکراو.
ئەنجومەنی سەرکردایەتیی شۆڕش (مجلس قيادة الثورة) لە عێراقدا، بەرزترین دەسەڵاتی بڕیاردان و یاسادانان و جێبەجێکردن بوو لە سەردەمی دەسەڵاتی حزبی بەعسدا (لە نێوان ساڵانی ۱۹٦۸ تا ۲۰۰۳).
|