" لە بەغدا هەنگاوێکی مێژوویی بۆ کۆتاییهێنان بە شێواندنی ناوی کورد دەنێین"

پەرلەمانتارێکی کورد لە بەغدا هەنگاوێکی مێژوویی بۆ کۆتاییهێنان بە شێواندنی ناوی کورد لە بەڵگەنامە فەرمییەکانی عێراقدا دەنێت.

لە پێشهاتێکی سیاسی و کارگێڕی گرنگدا کە ڕاستەوخۆ پەیوەستە بە پاراستنی ناسنامەی نەتەوەیی و کولتووریی گەلی کورد لە عێراق، هەوڵێکی چڕ و فەرمی لە عێراقدا دەستیپێکردووە تاکو دامەزراوە فەڕمییەکانی دەوڵەت پیتە تایبەتەکانی زمانی کوردی لە سەرجەم سیستمە ئەلیکترۆنی و بەڵگەنامە فەرمییەکاندا جێگیر بکەن بە تایبەتی لە سنوری ماددەی (١٤٠). 

ئەم دەستپێشخەرییە لەلایەن پەرلەمانتاری عێراق پۆڵا شەهید سیروان ئەنجام دراوە و بە نوسراوێکی ڕەسمی کە ئاڕاستەی وەزارەتی ناوخۆی عێراق کراوە.  لە پێناوی چارەسەرکردنی ڕیشەیی کێشەیەکی تەکنیکی و کارگێڕییە کە بۆ چەندین ساڵە بووەتە هۆی شێواندنی ناوی هاووڵاتیانی کورد لە بەڵگەنامە گرنگەکانی وەکو کارتی نیشتمانی، پاسپۆرت و کارتی زانیاری و فۆڕمی خۆراک. 

لە نوسراوەکەدا ئاماژە  بە ماددەی (٤ / بەشی یەکەم) لە دەستووری هەمیشەیی عێراق، کراوە، کە بە ڕوونی زمانی کوردی وەک زمانێکی فەرمی لە پاڵ زمانی عەرەبیدا چەسپاندووە.

پەرلەمانتار پۆڵا شەهید سیروان جەخت لەوە دەکاتەوە کە نەبوونی پیتەکانی  (پ، چ، ژ، گ، ڵ، ۆ، ێ، ڕ، ڤ، وو) لە سیستمە ئەلیکترۆنییەکانی دەوڵەتدا، تەنها کێشەیەکی تەکنیکی نییە، بەڵکو پێشێلکارییەکی ئاشکرای دەستوور و نادادپەروەرییە بەرامبەر بە مافی هاوڵاتیبوون.

کۆتاییهێنان بە "زيان" و "بشتيوان"

لە بەشێکی تری نووسراوەکەدا، بە بەڵگەی سەلمێنەرەوە ئاماژە بە چەندین نموونە کراوە کە چۆن ئەم کەموکوڕییە تەکنیکییە دەبێتە هۆی گۆڕینی یەکجاری مانای ڕاستەقینەی ناوەکان. بۆ نموونە، ناوی ڕەسەنی (ژیان) بەهۆی نەبوونی پیتەکانەوە دەگۆڕدرێت بۆ (زيان)،  کە لە زمانی عەرەبیدا زیان پێچەوانەی مانای ژیانە، (پشتیوان) دەبێتە (بشتيوان)، (ڕزگار) دەبێتە (رزكار)، و (گەوهەر) دەبێتە (کوهر). هەڵاڵە دەبێت بە ( هلالە) کە هیچ مانا و مەبەستێک نابەخشن و زیانێکی دەروونی و مێژوویی لە ناسنامەی کەسی و نەتەوەیی کورد دەدەن. 

جێی ئاماژەیە، نووسراوەکە لەلایەن بریکاری وەزیرەوە هامشی کارگێڕی پێویستی لەسەر کراوە و ئاڕاستەی بەشی یاسایی کراوە بۆ مەبەستی بەدواداچوون و جێبەجێکردن.