وەزارەتی دارایی بۆ وەزارەتەکان: دەستبەجێ ڕێکارەکانی پلەبەرزکردنەوە دەستپێبکەن

وەزارەتی دارایی هەرێمی کوردستان لەڕێگەی نووسراوێکەوە داوا لە وەزارەت و فەرمانگەکان دەکات دەستبەجێ ڕێکارەکانی پلەبەرزکردنەوە دەستپێبکەن.

وەزارەتی دارایی و ئابووریی حکومەتی هەرێمی کوردستان لە ڕێگەی گشتاندنێکەوە کە ئاڕاستەی گشت وەزارەت و دەستەکانی کردووە، ڕێنمایی تایبەت بە زەمینەسازکردن بۆ پلەبەرزکردنەوەی فەرمانبەرانی شارستانی بڵاوکردەوە.

♦️ دەقی نوسراوەکەی وەزارەتی دارایی هەرێم:

پاڵپشت بە نووسراوی ئەنجومەنی وەزیران ژمارە (٨٤٢٩) لە (٢٠٢٤/٧/١٥) سەبارەت بە دەستپێکردنەوەی پلەبەرزکردنەوەی فەرمانبەرانی شارستانی.

دوای ڕاگرتنی پلەبەرزکردنەوەی فەرمانبەران بەهۆی قەیرانی دارایی لە ساڵی (٢٠١٦)، حکومەتی هەرێمی کوردستان بڕیاریدا بە دەستپێکردنەوەی پڕۆسەکە بۆ گشت فەرمانبەرانی شارستانی کە شایستەی پلەبەرزکردنەوەن و مەرجە یاساییەکانیان تێدایە.

ئەم بڕیارە بە چەند قۆناغێک جێبەجێ دەکرێت، لە قۆناغی یەکەمدا ئەو فەرمانبەرانە دەگرێتەوە کە لە پلەی (١٠) تا پلەی (٢)ی فەرمانبەرانن و مەرجەکانیان تێدایە. پلەبەرزکردنەوەی پلە یەکەکان و پلە باڵاکان لە قۆناغی دووەمدا دەبێت.

پێویستە لێژنە تایبەتەکان لە وەزارەتەکان و دامەزراوەکاندا پڕۆسەی پلەبەرزکردنەوەی فەرمانبەرانی خۆیان بەپێی ڕێنماییەکان ئەنجام بدەن و لیستەکانیان ڕەوانەی وەزارەتی دارایی بکەن.

ئەم بڕیارە لە ڕێکەوتی (٢٠٢٤/١/١)ەوە جێبەجێ دەکرێت و مافە داراییەکانی فەرمانبەران لەو ڕێکەوتەوە بۆیان هەژمار دەکرێت.