پارتی و یه‌كێتی له هه‌ولێر كۆده‌بنه‌وه
3 کاتژمێر پێش ئێستا
23 جار خوێنراوەتەوە
بڕیاره سبه‌ی دوشه‌ممه، شانده‌كانی پارتی دیموكراتیی كوردستان و یه‌كێتیی نیشتمانیی كوردستان كۆببنه‌وه و به‌گوێره‌ی زانیاریه‌كانیش، پارتی به‌نیازه سه‌ردانی لایه‌نه سیاسیه‌كانی دیكه‌ش بكات.
به‌گوێره‌ی زانیاریه‌كانی ٧ڕۆژ كه له‌سه‌رچاوه‌یه‌كی باڵای سیاسیی ده‌ستیكه‌وتون، سبه‌ی دوشه‌ممه پارتی و یه‌كێتی له‌ڕێگه‌ی شاندی دانوستانكاریانه‌وه له‌شاری هه‌ولێر كۆده‌بنه‌وه، یه‌كێك له ئامانجه سه‌ره‌كییه‌كانی كۆبونه‌وه‌كه‌ش، گفتوگۆكردن له‌باره‌ی كابینه‌ی ده‌یه‌می حكومه‌تی هه‌رێمی كوردستان ده‌بێت.
ئه‌و سه‌رچاوه‌یه ئاشكراشیكرد، "شانده‌كه‌ی پارتی به‌نیازه له‌دوای كۆبونه‌وه‌كه‌ی له‌گه‌ڵ یه‌كێتی، سه‌ردانی هه‌مو لایه‌نه سیاسیه‌كانی دیكه‌ش بكات و هه‌وڵه‌كانی به‌مه‌به‌ستی پێكهێنانی كابینه‌ی نوێی حكومه‌تی هه‌رێمی چڕبكاته‌وه".
ئه‌و سه‌رچاوه‌یه ئاشكراشیكرد، "پارتی ده‌یه‌وێت له‌ڕێگه‌ی ئه‌و سه‌ردانانه‌وه دو په‌یام به‌لایه‌نه‌كان بگه‌یه‌نێت، یه‌كه‌م ڕێكخستنه‌وه‌ی په‌رته‌وازه‌یی نێوماڵی كورد و یه‌كگوتاری لایه‌نه كوردیه‌كان بۆ پێكهێنانی حكومه‌تی نوێی عێراق، دوه‌میش په‌له‌كردن له پێكهێنانی حكومه‌تی نوێی هه‌رێم".
كۆبونه‌وه‌كه له‌كاتێكدایه له چه‌ند رۆژی رابردودا، شه‌ڕێكی میدیایی توند له‌نێوان میدیاكانی هه‌ردولا دوای بۆردومانه‌كه‌ی كێڵگه‌ی غازی كۆرمۆر له چوارشه‌ممه‌ی رابردو دروستبوه.
|