په‌كه‌كه‌: هه‌نگاوی نوێ نانێین و چاوه‌ڕێی توركیا ده‌كه‌ین

ئامه‌د مه‌لازگرد فه‌رمانده‌ی هێزه‌كانی پاراستنی گه‌ل (هه‌په‌گه‌) ئه‌مڕۆ یه‌كشه‌ممه‌ رایگه‌یاند، په‌كه‌كه‌ "هیچ هه‌نگاوێكی دیكه‌ نانێت" له‌ پڕۆسه‌ی ئاشتی له‌گه‌ڵ ئه‌نقه‌ره‌ و داوایكرد عه‌بدوڵا ئۆجه‌لان ئازاد بكرێت.

ئامه‌د مه‌لازگرد به‌ ئاژانسی فرانس پرێسی ڕاگه‌یاند، "هه‌مو هه‌نگاوه‌كانی ده‌ستپێشخه‌ریه‌كه‌ی عه‌بدوڵا ئۆجه‌لانمان جێبه‌جێكرد، هیچ رێوشوێنێكی دیكه‌ ناگرینه‌به‌ر و له‌ئێستاشدا چاوه‌ڕوانی توركیا ده‌كه‌ین و ده‌بێت ئه‌وان هه‌نگاو بنێن". 

وتیشی، "دوو داواكاری سه‌ره‌كیمان هه‌یه‌، یه‌كه‌میان ئازادكردنی ئۆجه‌لان كه‌ له‌ ساڵی 1999ه‌وه‌ له‌ دورگه‌ی ئیمڕاڵی زیندانیكراوه‌، دوه‌میش دانپێدانانی ده‌ستوری و فه‌رمیه‌ به‌ گه‌لی كورد له‌ توركیا".
 
"نێوه‌ندگیری ئاشتی" نێوان په‌كه‌كه‌ و (په‌كه‌كه‌) داوا له‌ په‌رله‌مانی توركیا ده‌كات یاسا له‌سه‌ر پرسی كورد ده‌ربكات.

ئه‌مه‌ش دوای ئه‌وه‌ هات، هه‌فته‌ی ڕابردو نوسینگه‌ی سه‌رۆكی په‌رله‌مانی توركیا بڵاویكرده‌وه‌، شاندێكی كۆمسیۆنی په‌رله‌مانی توركیا كه‌ په‌یوه‌ندیداره‌ به‌ چه‌كداماڵینی په‌كه‌كه‌ بۆ یه‌كه‌مجار سه‌ردانی ئیمڕاڵیان كرد و له‌گه‌ڵ عه‌بدوڵا ئۆجه‌لان كۆبونه‌وه‌.

لە كۆتاییەكانی ساڵی ڕابردو بە دەسپێشخەری دەوڵەت باخچەلی، سەرۆكی مەهەپە لەناو پەرلەمانی توركیاوە، پڕۆسەیەكی نوێی ئاشتی لەو وڵاتە دەستپێكرد و دوای زنجیرەیەك كۆبونەوە، عەبدوڵا ئۆجەلانی ڕێبەری پەكەكە، لە 27ـی (شوبات/2)ـی ئەمساڵ داوای هەڵوەشاندنەوەی ئەو حزبە و دیموكراتی بۆ توركیای كرد. 

لە وەڵامدا پەكەكە مانگی (ئایار/5) كۆنگرەی 12ـی ئەنجامدا و بڕیاری خۆهەڵوەشاندنەوەی دا، هەروەها لە ڕۆژی 11ـی (تەمموز/7)، وەک نیازپاکی لەلایەن گروپێکی گەریلاوە کە ژمارەیان 30 کەسبو، چەکەکانیان داناو و دواتریش لە ڕێگەی ئاگرەوە سوتێنران. لەگەڵ ئەوەشدا ڕۆژی 26ی (تشرینی یەکەم/10) پەكەكە كشانەوەی تەواوەتی لە توركیا ڕاگەیاند. لە ئێستاشدا چاوەكان لەسەر هەنگاوەكانی توركیایە بۆ بەرەوپێشچونی پڕۆسەكە.