کۆمەڵگا لەبنەرەتدا هەر دوو پێیە..؟!

کۆمەڵگەی مرۆڤایەتی بۆ رێکردن پێویستی بە دوو پێ هەیه، ئەو دوو پێیەش گوزارشتن لە دوو جەمسەری پێچەوانەی یەکدی. 

کۆمەڵگا ناتوانێت لەسەر یەک پێ پێشڕەفت بکات. ئەگەر تەماشایی هەر کۆمەڵگەیەکی پێشکەوتو بکەین، دەبینین دوو بەرەی دژیەکی تێدایە، بەرەیەکیان موحافیزکارن کە دەیانەوێت هەموو ڕێساکان لەسەر قەوانە کۆنەکەی خۆیان برۆن و هیچ گۆرانکارییەک ڕوو نەدات ، تەنانەت بڕواشیان وایە جیهان لەمە باشتر نابێت، ئیدی کەسیش لە خۆڕا خۆی شەکەت نەکات، لە هەمبەردا گرۆهێکی دیکە دەبینین کە لە جیهانبینییان تەواو پێچەوانەیە، بانگی گۆڕانکاری و نوێبونەوە لە مینبەرەکانیانەوە دەدرێت و برواشیان وایە دەکرێت شتانێک بئافرێنرێن کە پێشتر نەبوون.

هەبونی ئەم دوو جەمسەرە پێویستن بۆ بەردەوامبونی کۆمەڵگە، سەرەنجامی کاریش لەسودی ڕیفۆرمخوازەکان کۆتایی دێت، نەبونی ئەم گروپانە لە کۆمەڵگادا مایەیوێرانبون ومەنگبونی کۆمەڵگایە، بەڵام ئامانجی موحافیزکارەکان هەر ئەوەیە کۆمەڵگەیە ببەستن و لە جوڵەی بخەن.

هەردوو لایان خزمەتێکی باش بە کۆمەڵگە دەگەیەنن بەبێ ئەوە خۆیان هەستی پێ بکەن، خۆ ئەگەریش موحافیزکارەکان نەبن، ئەوا رێفۆرمخوازەکان بە جۆرێک قەڵەمبازی بەرز بەرز بە کۆمەڵگە دەدەن کە وەختە ملی بشکنێنن.

ئەو دوو پێیەی کە گوتمان، یەکێکیان ڕی دەگرێت و یەکێکیشیان هەنگاو هەڵدەگرێت، بزووتن تەنها لە یەک دۆخدا ئەنجام دەدات بە دەستەوە ئەویش پێکەوەبونی هێزی وەستان و جوڵە پێکەوە.

کۆمەڵگەی چاک ئەوەیە، بەکاوەخۆ هەنگاو دەنێ، نە بۆگەن دەکات و نە لافاو هەڵدەستێنێت، هەردوو جەمسەرەکە هاوتان و هیچیان بەسەر هیچیاندا زاڵ نابن.