"هەرکەسێک نرخی کاڵا و پێویستییەکان گران بکات سزا دەدرێت"
56 خولەک پێش ئێستا
165 جار خوێنراوەتەوە
پارێزگاری سلێمانی دڵنیایی دەداتە هاووڵاتییان کە چاودێرییەکان بەسەر بازاڕدا چڕکراونەتەوە و بە توندی رووبەڕووی هەر هەوڵێکی نایاسایی دەبنەوە بۆ گرانکردنی نرخی کاڵا و پێداویستییەکان.
د. هەڤاڵ ئەبوبەکر، پارێزگاری سلێمانی بەمیدیاکانی راگەیاند، لێژنە تایبەتمەندەکانی قایمقامیەت و لایەنە پەیوەندیدارەکان، بەشێوەیەکی بەردەوام و مەیدانی چاودێریی جموجۆڵ و نرخەکانی بازاڕ دەکەن.
پارێزگاری سلێمانی جەختی لەوە کردەوە، کارەکانیان بە ئامانجی پاراستنی مافی بەکاربەرە و بە هیچ شێوەیەک رێگە بە بەرزکردنەوەی نایاسایی و ناپاساوی نرخی کاڵاکان نادەن.
پارێزگاری سلێمانی هۆشداری دا و رایگەیاند، تیم و لێژنەکانیان بە وردی چاودێریی دۆخی بازاڕ دەکەن و لە ئەگەری سەرپێچیدا، رێگە نادەن هیچ کەس و لایەنێک دۆخەکە بۆ بەرژەوەندیی تایبەتیی خۆی بقۆزێتەوە و رێکاری یاسایی توند بەرامبەر سەرپێچیکاران دەگیرێتەبەر.
ئەمڕۆ چوارشەممە، 7ـی تشرینی یەکەمی 2026، بانکی ناوەندیی عێراق بەهای فرۆشتنی یەک دۆلاری بۆ هاووڵاتیان بە 1520 دینار دیاری کرد ئەوەش کاریگەری لەسەر بازاڕ و نرخەکان دروست کردووە.
|