رووفاتی 153 ئەنفالکراو دەگەڕێندرێتەوە هەرێمی کوردستان
1 کاتژمێر پێش ئێستا
22 جار خوێنراوەتەوە
ژمارەیەکی دیکە لە رووفاتی ئەنفالکراوان کە 153 رووفاتن و لە بیابانەکانی سەماوە دۆزراونەتەوە، ئەمڕۆ شەممە 26ی ئەیلوولی 2026 دەگەڕێندرێنەوە هەرێمی کوردستان. بەڕێوەبەری شەهیدان و ئەنفالکراوانیش دەڵێ، دوای تەواوبوونی رێکارەکان بە خاک دەسپێردرێن.
ئەدیب لەتیف، بەڕێوەبەری شەهیدان و ئەنفالکراوانی سلێمانی رایگەیاند، "رووفاتی 153 قوربانیی ئەنفال لە گۆڕێکی بە کۆمەڵ لە بیابەنەکانی سەماوە دۆزراونەتەوە و ئەمڕۆ شەممە دەگەڕێندرێنەوە سلێمانی."
بەڕێوەبەری شەهیدان و ئەنفالکراوانی سلێمانی ئاماژەی بەوەش کرد، رووفاتەکان زۆربەیان ژن و منداڵن، خەڵکی ناوچە جیاوازەکانی هەرێمی کوردستانن، دوای تەواوبوونی رێکارەکان بە خاک دەسپێردرێن.
دۆزینەوەی رووفاتەکان و هێنانەوەیان بە هاوبەشی دەزگای شەهیدانی هەرێمی کوردستان و پزیشکی دادی بەغدایە. ئەدیب لەتیف دەڵێت، "نموونەی خوێن لە رووفاتەکان وەرگیراوە و بەراورد دەکرێ بە خوێنی کەسوکاری ئەنفالکراوان، بەگوێرەی بەڵگە و رێکارەکان دەبرێنەوە شوێنی خۆیان و بە خاک دەسپێردرێن."
|