لە چ کاتێکدا سەرئێشە مەترسیدارە و پزیشک ببیندرێت؟
2 کاتژمێر پێش ئێستا
32 جار خوێنراوەتەوە
سەنتەرێکی پزیشکی لە ئەمریکا هۆشداری دەدات، هەموو سەرئێشەیەک ئاسایی نییە و ئاماژە بەو نیشانە مەترسیدارانە دەکات کە پێویستی بە سەردانیکردنی خێرای پزیشک هەیە.
تیمی پزیشکیی پسپۆڕیی مێشک و دەمار لە مایۆکلینیک لە ئەمریکا دەریخستووە، سەرئێشە دەبێت لەم دۆخانەدا بە هەند وەربگیرێت؛
- ئەو سەرئێشەیەی لەناکاو و لە چەند چرکەیەکدا سەرهەڵدەدات و دووبارەدەبێتەوە.
- ئەگەر سەرئێشەکە لەگەڵ لاوازی یان سڕبوونی دەست و پێ، تێکچوونی قسەکردن، گێژبوون، قورسایی لە رۆیشتن، تای بەرز و رەقبوونی ملدا هەبێت.
- هەر سەرئێشەیەک لەکاتی خەودا هەڵتسێنێت، رۆژ بە رۆژ تووندتر ببێت و بە دەرمانە ئاساییەکان نەوەستێت.
- ئەو کەسانەی سەرووی 50 ساڵن و بۆ یەکەمجار تووشی سەرئێشەی نوێ دەبن یان ئەو سەرئێشانەی لە کاتی وەرزشکردن، کۆکە و پژمیندا دروستدەبن.
مایۆکلینیک ئاماژە بەوەش دەکات، زۆربەی سەرئێشەکان مەترسیدار نین و پەیوەندییان بە گوشاری دەروونی یان ماندووبوونەوە هەیە، بەڵام جیاکردنەوەی سەرئێشەی ئاسایی لە سەرئێشەی مەترسیدار زۆر گرنگە، بۆیە لەکاتی بوونی هەر سەرئێشەیەکی نائاسایی و لەناکاودا، هەرگز پشتگوێ نەخرێت و بە خێرایی سەردانی پزیشک یان بەشی فریاکەوتن بکرێت، چونکە ناسینەوەی زووی هۆکارەکە دەتوانێت ژیانی نەخۆشێک رزگار بکات.
|