لە عێراق شەش ملیۆن چەک لە دەستی هاووڵاتییان وەرگیراوەتەوە

وتەبێژی وەزارەتی ناوخۆی عێراق ڕایگەیاند، نزیکەی شەش ملیۆن چەک لە بانکی نیشتمانیی عێراق تۆمارکراوە، هەروەها هەزاران داواکارییان پێگەیشتووە بۆ ئەوەی چەکی هاووڵاتییان وەربگرنەوە، تۆمارکردن و پێدانی مۆڵەتی چەک تا کۆتایی ئەمساڵ بەردەوام دەبێت.

عەقید عەباس بەهادلی، وتەبێژی وەزارەتی ناوخۆی عێراق، سەبارەت بە ژمارەی ئەو چەکانەی لە دەستی هاووڵاتییان وەرگیراون و بەردەوامبوونی پرۆسەکە، ڕایگەیاند، دۆسییەی ڕێکخستنەوەی چەک شایەتی پێشکەوتنی ڕوونی بەخۆیەوە بینیوە، ژمارەی فەرمانگەکانی تۆمارکردن گەیشتووەتە ٨٦٤ فەرمانگە لە سەرتاسەری عێراق، هەروەها ٣١٠ هەزار فۆڕمی داواکاریی تۆمارکردن وەرگیراون و پێداچوونەوەیان بۆ کراوە.

ئاماژەی بەوەش کرد، ژمارەی ئەو چەکانەی لە بانکی چەکی نیشتمانیی عێراق کۆکراوەتەوە گەیشتووەتە پێنج ملیۆن و ٨٠٠ هەزار چەک، ناونووسین لەڕێگەی ئەپڵیکەیشنی “چاوی عێراق”ەوە ئەنجام دەدرێت و فۆڕمی تۆمارکردن بەخۆڕاییە.

لە کۆتاییدا وتی: فەرمانگەکانیان مامەڵە لەگەڵ سەرجەم ڕێکارەکان بۆ وەرگرتنی چەکەکەوە تا پێدانی مۆڵەت دەکات، هەروەها تۆمارکردنی چەک تا ٣١ـی کانوونی یەکەمی ٢٠٢٦ بەردەوام دەبێت.