زانیاری نوێ لەبارەی هەناردەکردنەوەی نەوتی کوردستان

ئەپیکور دەڵێت، ئەوان بۆ دەسپێکردنەوەی هەناردەی نەوت پەلەیانە و وەبەرهێنانیان بەبڕی "400 ملیۆن دۆلار" وەستاندووە.
 
کۆمەڵەی پیشەسازیی نەوتی کوردستان (ئەپیکور) لە تۆڕی کۆمەڵایەتیی ئێکس بڵاویکردەوە: "کۆمپانیا ئەندامەکانی ئەپیکور بۆ دەستپێکردنەوەی هەناردەی نەوت پەلەیانە. لە هەوڵەکانی گفتوگۆ لەگەڵ بەغدا لە پێشی پێشەوەین."
 
ئەپیکور رایگەیاند، بەھۆی داخستنی بۆریی نەوتی عێراق-تورکیاوە: "وەبەرھێنانەکانمان زیانی زۆریان بەرکەوتووە و ناچارکراوین بە داشکاندنێکی بەرچاو لە نرخی بازاڕە جیھانییەکاندا نەوت بفرۆشین. نرخی جیھانی دوو ئەوەندەی ئەو نرخەیە کە لە نێوخۆ دەفرۆشرێت."
 
بەوتەی ئەپیکور، کۆمپانیاکان بەھۆی وەستانی ھەناردەی نەوتەوە، وەبەرھێنانی 400 ملیۆن دۆلاریان وەستاندووە. ئەگەر بۆریی نەوتی عێراق-تورکیا بکرێنەوە و دڵنیایی بە کۆمپانیا نێودەوڵەتییەکان لە مافە گرێبەستییەکانیان بدرێت، ئەوکات وەبەرھێنانەکان بەردەوام دەبن.
 
ئاماژەی بەوەشکرد: "ئێمە ئامادەین رێککەوتن لەگەڵ حکومەتی عێراق و حکومەتی ھەرێمی کوردستان بکەین و دەست بە ھەناردەکردن بکەینەوە. پاراستنی ماف و وەبەرھێنانەکانمان زۆر گرنگە. ئێمە ئەم خاڵانەمان بە ھەموو لایەنە پەیوەندیدارەکان راگەیاندووە."
 
دوای بڕیارێکی دادگایەکی نێودەوڵەتی لە پاریس، لە ئاداری 2023ـەوە هەناردەی نەوتى هەرێمی کوردستان و کەرکووک لە رێگەی تورکیاوە راگیرا.