بارسێلۆنا بەدەست قەیرانێکی گەورەوە دەناڵێنێت

دێوەزمەی پێکانەکانی بارسێلۆنا بەردەوامە و یاریزانەکانی تووشی 13 پێکان بوونە لە ماوەی 3 مانگدا، بۆیە ئەم دۆخە یانەکە ناچار دەکات پلانێکی فریاگوزاریی خێرا دابنێت.
 
لە یانەی بارسێلۆنا دۆخێکی نائارامی و دڵەڕاوکێ سەری هەڵداوە، بەهۆی ئەوەی لە سەرەتای ئەم وەرزەوە پێکانەکان بوونەتە دیوەزمەیەک بۆ هانزی فلیکی راهێنەری ئەڵمانی و ستافی تەکنیکی . ئاستی توانای جەستەیی یاریزانەکانی بەشێوەیەکی بەرچاو دابەزیوە، و ژمارەی پێکانەکان بەشێوەیەکی بێوێنە زیادیکردووە، ئەمەش وایکردووە تیپەکە رووبەڕووی قەیرانێک ببێتەوە کە هەڕەشە لە سەقامگیریی هونەری و هاوسەنگییەکەی دەکات لە پاڵەوانێتییە ناوخۆیی و ئەورووپییەکاندا.
 
بەپێی راپۆرتێکی رۆژنامەی ئەی ئێسی ئیسپانی، فلیک زۆر نیگەرانە لە دۆخی جەستەیی یاریزانەکانی، پاش ئەوەی داتاکانی شیکردنەوەی جەستەیی دەرخەری ئەوە بوون کە ئاماژەکان لەچاو وەرزی رابردوودا دابەزیون، چ لە خێرایی زۆر و چ لە توانای بەرگەگرتن لە کاتی یارییەکاندا. ئەم دابەزینە کاریگەری لەسەر ئاستی تیپەکە هەبووە کە کەمتر کاریگەر بووە لە پەستان خستنە سەر یاریزانانی بەرامبەر و بڵاوبوونەوە لە یاریگەدا.
 
کارگێڕی بارسێلۆنا پێیوایە ئەم دابەزینە لە توانای جەستەیی یاریزانەکان یەکێکە لە هۆکارە راستەوخۆکانی ژمارەی زۆری پێکانەکان، کە گەیشتووەتە 13 پێکان لە ماوەی 3 مانگدا. ئەم دۆخە ناڕەزایەتییەکی فراوانی لە ژووری جلگۆڕیندا لێکەوتووەتەوە، چونکە هەندێک یاریزان ناڕەزایەتییان دەربڕیوە سەبارەت بە بەرنامەکانی توانای جەستەیی لە ناو یانەکەدا، کە بەپێی بۆچوونی ئەوان، ئەم بەرنامانە گونجاو نین لەگەڵ پێداویستییەکانی وەرزی درێژ.
 
رۆژنامە ئیسپانییەکە ئاماژەی بەوەداوە کە هەندێک یاریزان دەستیان بە هەنگاوی تاکەکەسی کردووە بۆ باشترکردنی توانای جەستەیی خۆیان، چ بە کارکردن لەگەڵ شارەزایانی تایبەت یان بەئەنجامدانی راهێنانی زیادە لە دەرەوەی شاری وەرزشی. لەکاتێکدا هەندێکیان کارکردن لە هۆڵە وەرزشییە دەرەکییەکان بەباش دەزانن، ئەوانی دیکەش داوای یارمەتییان لە شارەزایانی خۆراک و توانای جەستەیی کردووە بۆ گەڕاندنەوەی ئامادەیی جەستەییان.
 
نموونەیەک بۆ گەڕان بە دوای چارەسەری دەرەکی
 
ناوی فێران تۆرێس وەک یەکێک لە دیارترین نموونەکانی ئەم ئاراستەیە دەرکەوت، چونکە داوای یارمەتی لە شارەزایانی بواری دەروونی کرد بۆ یارمەتیدانی لە تێپەڕاندنی قۆناخەکانی دڵەڕاوکێ کە پێشتر کاریگەرییان لەسەر هەبوو، هەروەها داوای یارمەتی لە راهێنەرێکی تایبەتی توانای جەستەیی کردووە بۆ بەهێزکردنی ماسوولکەکانی و باشترکردنی توانای جەستەیی پاش زنجیرەیەک پێکان، کە لە وەرزەکانی رابردوودا رێگرییان لە پێشکەوتنەکانی کردبوو.
 
ئەم دەستپێشخەرییە تاکەکەسییانە بوونەتە دیاردەیەکی زیادبوو لەنێوان یاریزانانی بارسێلۆنادا، لە سێبەری نەبوونی سەقامگیریی جەستەیی تیپەکە و دووبارەبوونەوەی پێکانەکان کە کاریگەرییان لەسەر زۆربەی پۆستەکانی نێو یاریگەدا هەبووە.
 
سەرەڕای رەخنەکان، کارگێڕیی بارسێلۆنا هێشتا پشتگیرییەکی روونی بۆ بەرپرسی ئامادەکاریی جەستەیی، خولیۆ تۆس دەربڕیوە، کە یەکێکە لە دیارترین شارەزایانی ئەورووپا.
 
کارگێڕیی یانەکە باوەڕی وایە کە ئەو توانای هەیە بۆ راستکردنەوەی کەموکورتیی ئێستا، بەتایبەتی کە ئەو خاوەنی ئەزموونێکی درێژە لە مامەڵەکردن لەگەڵ باری راهێنانی بەرز و بەرنامەکانی گەڕاندنەوەی ماسوولکەکان.
 
راپۆرتە رۆژنامەڤانییەکان ئاشکرایانکردووە کە تۆس رۆڵێکی گەورەتری دەبوو ئەگەر چاڤی هێرناندێز لە راهێنەرایەتیی تیپەکەدا بمایەتەوە، چونکە بڕیاربوو بەشێوەیەکی راستەوخۆ بەرپرسیاریەتیی هێزی جەستەیی لەناو ستافی هونەریدا بگرێتە ئەستۆ.
 
بارسێلۆنا لە ئێستاوە دەستی بە جێبەجێکردنی پلانێکی چاکسازیی گشتگیر کردووە بۆ چارەسەرکردنی قەیرانەکە، کە بریتین لە زیادکردنی کاتەکانی کارکردن لەناو هۆڵی وەرزشیدا، و داڕشتنی بەرنامەی تاکەکەسی کە لەگەڵ دۆخی هەر یاریزانێکدا گونجاو بێت، هاوکات لەگەڵ داوای یارمەتی لە شارەزایانی دەرەکی بۆ چاودێریکردنی ئاستی توانای جەستەیی و چاکبوونەوە.
 
کارگێڕیی یانەکە لەڕێگەی ئەم رێوشوێنانەوە هەوڵدەدات تیپەکە بەزووترین کات بگەڕێنێتەوە ئاستی جەستەیی ئاسایی خۆی، پاش ئەوەی دابەزینی ئامادەیی جەستەیی بووەتە هەڕەشەیەکی راستەقینە بۆ ئامانجەکانی تیپەکە لەم وەرزەدا.
 
دۆخی لامێن یامال.. چاودێرییەکی ورد و چەند جۆرە بۆچوونێک
 
هاوکات، رۆژنامەی سپۆرتی کەتەلۆنی ئاشکرایکردووە کە ئەستێرەی لاو، لامێن یامال پشکنینی پزیشکیی دەرەکی ئەنجامداوە بۆ هەڵسەنگاندنی پێکانەکەی لە ناوچەی حەوزدا، ئەمەش مشتومڕێکی لە میدیای ئیسپانیدا لێکەوتووەتەوە. بەڵام رۆژنامەی ئەی ئێس روونیکردەوە کە ئەم پشکنینانە بەهەماهەنگیی تەواو لەگەڵ ستافی پزیشکیی یانەکە ئەنجامدراون، بەئامانجی وەرگرتنی چەند بۆچوونێک لە شارەزایانی تایبەتمەند.
 
پزیشکەکان کە راوێژیان پێکراوە، کۆک بوون لەسەر ئەوەی کە دۆخی یامال پێویستی بە نەشتەرگەری نییە، و چارەسەری پارێزگاری باشترین بژاردەیە بۆ ئێستا، لەگەڵ پێویستیی پابەندبوون بە بەرنامەیەکی جەستەیی تایبەت بۆ خۆپاراستن لە دووبارەبوونەوەی پێکانەکە.
 
بەهۆی کەمیی ژمارەی یاریزانان بەهۆی پێکانەکانەوە، فلیک دەستی بەپشتبەستن بە یاریزانانی تیپی دووەمی 'بارسێلۆنا ئاتلێتیک' کردووە، وەک ئامادەکارییەک بۆ هەر بارێکی لەناکاو. بەپێی رۆژنامەی مۆندۆ دیپۆرتیڤۆ، راهێنەری ئەڵمانی چاودێرییەکی وردی کۆمەڵێک بەهرەی لاو دەکات کە لەوانەیە داهاتووی نزیکی یانەکە پێکبهێنن.
 
لەنێو دیارترین ئەو ناوانەدا، چاڤی ئیسپارێتی تەمەن 18 ساڵان هەیە، کە سەرەتا وەک یاریزانی ناوەڕاست دەستی بە یاریکردن کرد، پێش ئەوەی بگۆڕێت بۆ باڵی راست، و لەم دواییانەش بەشداریی لە راهێنانەکانی تیپی یەکەمدا کردووە وەک ئامادەکارییەک بۆ دەرکەوتنێکی فەرمیی نزیک.
 
هەروەها لیستی بەهرەمەندە لاوەکان کە فلیک چاودێرییان دەکات بریتین لە: جۆفری تۆرێنتیس (تەمەن 18 ساڵ) لە باڵی چەپ، کە ئاستێکی نایاب لەگەڵ تیپی دووەمدا پێشکێش دەکات، پیدرۆ 'درۆ' فێرناندێز (تەمەن 17 ساڵ)، یاریزانی ناوەڕاست، کە هاوسەنگییەکی نایابی هەیە لە نێوان رۆڵە بەرگری و بنیادنەرەکاندا.  تۆنی فێرناندێز (تەمەن 17 ساڵ)، پێشتر لە وەرزی رابردوودا بەشداری لە چەند خولەکێکی فەرمیدا کردووە. جیلێ فێرناندێز (تەمەن 17 ساڵ)، بەهرەیەکی هونەریی تازەیە، بەڵام ئێستا ئەویش بەدەست پێکانێکەوە دەناڵێنێت.
 
هەنگاوەکانی فلیک تەنیا لە یاریزانانی نێو یاریگەدا نەوەستاون، چونکە دوو گۆڵپارێزی لاو، دیێگۆ کۆشین (تەمەن 19 ساڵ) و ئایدێر ئایر (تەمەن 18 ساڵ)یشی بانگهێشت کردووە بۆ بەشداریکردن لە راهێنانەکانی تیپی یەکەمدا، بەهۆی نائامادەیی تێرشتیگن و خوان گارسیا.

 راهێنەری ئەڵمانی ئەم هەنگاوە بەدەرفەتێک دەبینێت بۆ تاقیکردنەوەی داهاتووی گۆڵپارێزی لە بارسێلۆنا، وەک ئامادەکارییەک بۆ تێکهەڵکردنی یەکێکیان بەشێوەیەکی هێمنانە لەگەڵ تیپی یەکەمدا.
 
بارسێلۆنا ئێستا خۆی لە قۆناغێکی هەستیاردا دەبینێتەوە کە تێکەڵەیەکە لە ئاڵنگاریی پێکانە دووبارەبووەکان و گرەوکردن لەسەر نەوەیەکی نوێی بەهرەمەندەکانە. لەکاتێکدا فلیک هەوڵدەدات هاوسەنگیی تیپەکە لەڕووی جەستەیی و هونەرییەوە بگەڕێنێتەوە، هاندەرانی یانەکە هیوادارن کە پلانی چاکسازی سەرکەوتوو بێت لە کۆتاییهێنان بە قەیرانەکە، و لاپەڕەیەکی نوێ بکاتەوە کە درەوشانەوەی ئاسایی یانەکە بۆ گۆڕەپانی ناوخۆیی و ئەورووپی بگەڕێنێتەوە.