کارکردن لە کۆرمۆر بەرەو ئاساییبوونەوە دەچێ و غازی شلی ماڵان هەناردەی شارەکان کرا

دوای گەڕانەوەی کارمەند و تەکنیککارانی کێڵگەی غازی کۆرمۆر، ئەمڕۆ یەکەم کاروانی گازی شلی ماڵان (LPG) هەناردەی شارەکان کرا. 

شۆفێرێک لە کێڵگەکە دەڵێ، وەک پێش هێرشەکە گازیان بارکردووە و هیچ کێشەیەکیان نەبووە.
 
سەرچاوەیەک لە کێڵگەی کۆرمۆرەوە رایگەیاند، ئەمڕۆ یەکەم کاروانی غازی شلی ماڵان کە هەشت تانکەر بوون وەک تێست لە کێڵگەوەکەوە هەناردەی شارەکان کران.
 
یوسف نووری، یەکێک لە شۆفێری تانکەرەکان لە کۆرمۆر وتی: "کاتژمێر 09:00ـی ئەمڕۆ پەیوەندییان پێوە کردین بچین غازی شل باربکەین. ئێمەش وەکو رۆژانی ئاسایی چووین و غازمان بارکرد".
 
ئەو شوفێرە دەشڵێت: "شوێنێکی گەورە کراوەتە ئامانج و سووتاوە، ئێستا تیمەکان سەرقاڵی کارکردنن تێیدا، ئەویش کۆگایەکی نەفتایە، تاوەکو ئێستا لای ئەوان بارکردنی ئەو نەفتایە دەستیپێنەکردووەتەوە".
 
بە گوێرەی زانیارییەکان "پێدەچێ ئەمڕۆ داوا لە کۆمپانیای دانەغاز بکرێ، بە فەرمی دەستبکاتەوە بە بەرهەمهێنانی غاز بۆ وێستگەکانی کارەبا".
 
شەوی چوارشەممە 26ـی مانگی 11، نزیک کاتژمێر 11:30، هێرشکرایە سەر کێڵگەی کۆرمۆر و بەهۆیەوە ئاگر لە کۆگایەکی گەورەی کێڵگەکە کەوتەوە، بەهۆیەوە کارەبای نیشتمانی 80% کەمیکردووە.