ئەوەی لە دیمەشق بینیم

لەم ڕۆژانەدا ڕۆشتمە دیمەشق، سەردانی کوچەو کۆڵانەکانی شامی کۆن و ڕیفی دیمەشقم کرد، دیمەشق پێک هاتووە لە غووتەی ڕۆژهەڵات و غووتەی ڕۆژئاوا غووته واتە پارچەیەک بەهەشت «غوطة هي قطعة من الجنة» هەربەڕاستی دڵگیرو ساف و بێگەردە شام، هەم شەکرەو هەم شیرین، چونکە بەشێکی سەرەکی ئێستای سوریاو شام نیشتیمانی کوردانەو کورد بەئازادیی دەژی و خاوەنی پەرچەم و سیستم و خۆسەریی خۆیانن.

بەشێک لە گەڕەکە کۆن و دێرینەکانی دیمەشق گەڕام و هەموان بەجوانی و دڵی پاکەوە وەڵامی سڵاوەکانیان ئەدامەوە، لەوانە شەعلان و ئەبووڕومانەو قاسیون و مالیکی و مەزرەعەو حمێدی و مزگەوتی ئەمەویەکان و مەرقەدی پیاوچاکان و زانایان.

مرۆڤ کەدەبینێت ئەم گەلە بەشمەینەتە ڕزگاری بووە لەدەست جەورو ستەمی سیستمێکی دیکتاتۆری بەعسی و  فاشی و عەفلەقیی ڕەگداکوتراوی پەنجاساڵە، کۆڵێک دڵخۆش دەبێت و هەمانکات خەمبارانە دەڕوانێتە سەرو سیمای لەتلەت و پەرتبووی خەڵکی ئازاردیدەی ئەم وڵاتە.

 شام بە واقیعی وڵاتی شارستانیەت و کەلەپورو مێژووی کۆنی ئەمەویەکان و عەرەب و کوردەکانە، شاری سوننەی ڕاستەقینەیە، سوننەی هەژار، سوننەی خەلیفەکانی ڕاشیدین، سوننەی داگیرنەکراوی بێ نەوت و زيڕو بێ پارە، سوننەی کلاسیک، بەشەکەی تری زەمینی عەلەویەکان و دوورزیەکان و ئیسماعیلیەکان و ئاشوری و کەلدان و پێکهاتەکانە، ئینجا وڵاتی سەرکردەی شەهمی کورد و زەنگی، سەڵاحەدینی ئەیوبی و هەزاران ڕەمزو عەللامەی زەمانەیە تادەگاتە شێخ محەمەد سەعید ڕەمەزانی بوتی خوای گەورە دەرەجاتی عالی بکات و چوومە سەر گۆڕەکەی کەلەتەنیشت سەڵاحەددینی ئەیوبی ئەسپەردەکراوەو سڵاوی کوردی ڕاستەقینەم پێ گەیاندن.

دیمەشق وڵاتی سەرسەوزو خاکی بەپیت، وردە وردە خەریکە خۆی جوانتر دەکاتەوەو ڕەونەقی ئازادیی وەردەگرێتەوە، دوای ئەو هەموو تراژیدیاو ڕووداوانەی سەردەمی ئەسەدی باوک و کوڕ، کوڕە ستەمکارەکانی هەناوی ڕەشی عەرەبی، کەچی خەڵک هێشتا شەربەتی مێوژی گوشراوی جامۆڵکەی مسین و نانی تەندورو قاوەی گەرم دەخۆنەوەو گۆرانی دەڵێن و شوشەی پەنجەرەکانیان بەهێواشی دەسڕن، بۆ ژیانێکی باشتر دەڕوانن، ئەهلێکی ڕەسەن و میواندۆست، خاکی و ئازاو بێفیز، ئەهلی خواپەرست و زاهید و کاسب و دەمبەخەندەو نەبەزیو.

ئێستا ئەو ئەهلە ماندووە سەرگەرمی دوکان و بازاڕی خۆیانن نازانن ڕق و نەتەوەپەرستی و توڕەیی و تۆڵە چییە، جیاوازی چینایەتی چییە، نیوەیان عیبادەت دەکەن و نیوەشیان قلیان دەکێشن و هیوایان لەسەر ئایندە هەڵچنیوەو تامەزرۆی حکومەتێکی باشترن، ئەوان برسی بوون وەلێ یەک دەزگاو فەرمانگەشیان تاڵان نەکرد، وێڕای ئەوەی گیرفانی نەوەد لەسەدیان خاڵی خاڵیە لە پارەو لیرەی سوریی، موچەی مانگانەی مامۆستایەکیان دەدۆلارو سەرۆکی ئەنجومەنی پارێزگاکانیان کەمتر لە پەنجا دۆلاربوو، کەچی ڕوو لەهیوان، دڵیان بەشۆڕشە تازەکە خۆشەو بەیعەتیان داوەتێ و بەدڵیانەو ئازادن، دەوڵەتی نوێ هی خۆیانەو بەهی خۆشیانی دەزانن، سوریا هاتۆتەوە ڕیزی کۆمکاری عەرەبی سوننی ئەگەر لێگەڕێن، پێچەوانەی تونس و میسرو عێراق و یەمەن و لیبیا نەیانهێشت شۆڕشەکەیان بدزرێ و خۆیان لەسەر کورسیەکە دانیشتن و مۆدێلێکی تازەی ئەمەوی نوێیان بنیادنا بەحکومەتێکی نیشتیمانیی نوێوە.

 ئێستا قاوەخانەکان باشترو ئازادانەتر لەجاران جمەی دێ لەدەنگ و تریقەی کوڕان و کچان و دەنگی پیاڵەو فنجان و دوکەڵ و بۆنی عود، شارێک دوای پەنجا ساڵ ماتەم و دووربوون لەگەشەو بنیادنان و ئاوەدانی بەڵام هێشتا پڕە لە وزەو ئیشراق و جوانیەکانی خۆی، گەل خۆی سیستم دروست دەکاتەوە ئەگەر ئیرادەی هەبێ.